^Subira Hejuru

foto1 foto2 foto3 foto4 foto5
foto5

Murugo

Murakaza neza k'Urubuga rw'Ijwi rya Islam

 

Mu rwego rwo kwigisha no gukangurira abayisilamu bose mu Rwanda n'abari mu mahanga mukugira ubumenyi ku Idini y'Ukuri ariyo ISLAM; mu rwego rwo kumenyekanisha ISLAM kuri bagenzi bacu batari abayisilamu kugirango barusheho kuyisobanukirwa neza binyuranye n'uburyo bari basanzwe bayizi; mu Rwego rwogufasha Abanyarwanda mu guteza imbere igihugu cy'u Rwanda harimo Ubumwe n'ubwiyunge; kurwanya icyorezo cya SIDA "AIDS/HIV"; mu Rwego rwo gufasha abanyeshuli kubona serivisi zitandukanye zibafasha mumyigire yabo; urugero: kubashakira ibizamini bya Leta byakozwe mubihe byashize; kubagezaho notes z'amasomo atandukanye; mu Rwego rwogufasha abanyarwanda kumenya imiterere y'inzego bwite za Leta n'imiterere y'inzego z'umuryango w'abayisilamu mu Rwanda (A.MU.R) n'abazihagarariye; kumenya imishinga/ibikorwa bya A.MU.R ibyarangiye, ibigikorwa n'ibiteganywa gukorwa.

Ibiro bikuru by'Umuryango w'abayisilamu mu Rwanda A.MU.R (Urwego ruhagarariye ISLAM n'abayisilamu mu Rwanda) rwifashishije ishami ryarwo ry'ivugabutumwa (DA'AWA DEPARTMENT) ryishimiye kubagezaho uyu murongo witumanaho rigezweho ry'ikoranabuhanga "internet"; Urubuga rugamije kuba Ijwi rya Islam mu Rwanda no mu Mahanga. Mu bwitonzi bwanyu; mwisanzure kandi musome mutuje kuko tubafitiye inyigisho na za serivise nyinshi zigamije guteza imbere u Rwanda n'abanyarwanda.


Isomo ry'Icyumweru

NI GUTE WAKORESHA IMPANO Y'UBUSORE BWAWE? ------- (Rifate ryose muri PDF)

Ubusore ni impano n’ingabire ikomeye Allah yagize umwihariko w’inkumi n’abasore, kuko ari igihe cy’amahirwe akomeye, nicyo gihe cy’imbaraga n’ubushobozi buhambaye bwo gukora imirimo myinshi y’ingirakamaro mu buzima bw’isi no ku munsi w’imperuka idashoborwa n’abageze mu zabukuru n’abakiri abana.

Mu mirongo myinshi ya Qor’ani ntagatifu Allah yagaragaje ko igihe cy’ubusore ari cyo gihe cy’imbaraga umuntu anyuramo hagati y’ibihe bibiri by’intege nke ari byo igihe umuntu akiri umwana n’igihe amaze kugera mu zabukuru. Allah yaravuze ati:

 

“Allah niwe wabaremye muri abanyantege nke (muri impinja), maze nyuma y’integenke abaha imbaraga n’ubushobozi (muba abasore n’inkumi), maze nyuma y’imbaraga murongera musubira mu gihe cy’intege nke n’izabukuru, Allah arema ibyo ashatse kandi niwe mumenyi ushobora byose”.Qor’an 30: 54

Na none Allah yaravuze ati:

“ Allah niwe wabaremye abakomoye mu gitaka, nyuma yaho mubanza kuba Intanga, hakurikiraho kuba ikibumbe cy’amaraso, nyuma yaho Allah abavana mu nda z’ababyeyi banyu muri impinja, nyuma yaho muba abasore mugira imbaraga n’ubushobozi, nyuma yaho muba abasaza…”. Qor’an 40:67

Iyi mirongo ya Qor’ani ntagatifu ivuzwe hejuru iragaragaza ko hari ibyiciro bibiri by’intege nke ari byo icy’ubuhinja n’icy’ubusaza, naho igihe cy’imbaraga n’ubushobozi ni kimwe gusa ari cyo cy’ubusore n’ubukumi kibanzirizwa kikanaherukwa n’igihe cy’intege nke, ibyo bisobanye ko abasore n’inkumi bagomba gukoresha neza igihe cyabo bazirikana ko kitazagaruka ahubwo bakibuka ko bategerejwe n’igihe gikomeye cy’izabukuru n’intege nke aho bazakenera gutungwa n’ibyo bateganyije muri cya gihe cy’imbaraga n’ubusore bwabo.

Kugirango ubusore n’ubukumi bwawe buzakugirire akamaro, ugomba gusobanukirwa neza aya amahame remezo atanu (5) akurikira:

  1. IGIHE CY’UBUSORE NI CYO GIHE CYIZA CYO GUKORA

Abasore n’inkumi bagomba kumenya ko igihe cy’ubusore n’ubukumi ari cyo gihe cyiza cyo gukora no guteganya ibizabafasha mu buzima bukomeye bubategereje imbere kandi kikaba kitazagaruka, bityo bagomba kugifatirana kitarabacika bakagikoresha neza mu bibafitiye akamaro hano ku isi nko kwiga kugeza ku rwego rwo hejuru rushoboka, kwitabira umurimo n’ibindi bibafitiye akamaro hano ku isi no ku mperuka.

Intumwa Muhamadi (Allah amuhe amahoro n’imigisha) yagiriye umuntu inama iramubwira iti:

 

“Fatirana ibintu bitanu ubikoreshe neza mbere y’uko ibindi bitanu bikugeraho: Fatirana ubusore bwawe mbere y’uko ugerwaho n’ubusaza, fatirana ubuzima bwiza ufite mbere y’uko ugerwaho n’uburwayi, fatirana ubukire bwawe mbere y’uko ugerwaho n’ubukene, fatirana umwanya ufite mbere y’uko ugira ibiguhuza, fatirana igihe ukiriho y’uko ugerwaho n’urupfu”. Iyi mvugo iboneka mu gitabo cya Mus-tadrak n’icya Bayhaqi.

Abasangirangendo b’Intumwa Muhamadi basobanukiwe neza iri hame biyemeza gukoresha neza igihe cy’ubusore bwabo mu kwiyegereza Imana,ibyo bigararagarira aho Intumwa Muhamadi yagiraga inama umusangirangendo witwa Abdullah ibnu al’aswiy igihe yagaragazaga umurava n’ubushake bwo gusoma Qor’ani yose mu iswala z’ijoro rimwe,maze Intumwa Muhamad imugirira impuhwe iramubwira iti:

Ndatinya ko uzarambirwa ntubikomeze, none ibyiza ujye uyirangiza mu kwezi, uwo musangirangendo abwira Intumwa ati: Yewe Ntumwa y’Imana! Ndeka nkoreshe imbaraga zanjye n’ubusore bwanjye nkibufite, Intumwa iramubwira iti: Ngaho nibura ujye uyirangiza mu minsi icumi, Umusangirangendo ati: Oya, Ntumwa y’Imana! Ndeka nkoreshe imbaraga zanjye n’ubusore bwanjye nkibufite, Intumwa irongera iti: nibura ujye uyisoma uyirangize mu minsi irindwi, Umusangirangendo ati: Oya, Ntumwa y’Imana! Ndeka nkoreshe imbaraga zanjye n’ubusore bwanjye nkibufite”.

  1. IGIHE CY’UBUSORE NI  INDAGIZO KU MUNSI W’IMPERUKA  BURI WESE AZABAZWA UKO YAYIKORESHEJE

Abasore n’inkumi bagomba kumenya ko igihe cy’ubusore ari indagizo  bazakibazwa uko bagikoresheje, uwagikoresheje neza  azabihemberwa n’uwagikoresheje nabi azabihanirwa.

Allah  yaravuze ati :  “ Kandi muzabazwa ingabire zose mwahawe”. Qor’an 102:08

Intumwa Muhamadi (Allah amuhe amahoro n’imigisha) yaravuze iti:

"Ntabwo umuntu azashingura ibirenge bye ngo ajve imbere y’Imana atabajijwe ibintu bine: Ubusore bwe ibyo yabukoresheje, ubuzima bwe icyo yaburangirijemo, umutungo we uburyo yawubonye n’ibyo yawukoresheje”. Iyi mvugo iboneka mu gitabo cya Tirmidhi

  1. ABASORE N’INKUMI NI BO  BAMBERE BUGARIJWE.

Abasore n’inkumi bagomba kumenya ko ari bo ba mbere baba bugarijwe n’ibintu byose byaduka ku isi byaba ibyiza nk’ikoranabuhanga (Technology) n’ubundi bumenyi buri kugenda bugaragara kandi abo bugirira akamaro bwa mbere ni abakiri bato, kimwe n’uko ibyaduka bibi nabyo abo byugarije kandi  bihitana bwa mbere ari urubyiruko nk’ibiyobyabwenge, uburaya n’ubwomanzi, kwambara ubusa, imibonano y’abahuje ibitsina n’ibindi,ibyo bibi byose n’ayo mahano abo yugarije ba mbere kurusha abandi  ni urubyiruko, bityo abasore n’inkumi bagomba kugira ubushobozi bwo kubasha kumenya no  guhitamo ibyiza bibafitiye akamaro bakabyiga bakirinda gukurikira no kwigana  buhumyi bakagendera kure ibibi bibangiriza ukwemera kwabo n’ubuzima bwabo.

Intumwa Muhamad (Allah amuhe amahoro n’imigisha) yaravuze iti: “Ntihazagire umwe muri mwe uba nyamujya iyo bigiye, ahubwo nimubona abakora ibyiza namwe muzabikore, ariko nimubona abakora ibibi muzitandukanye n’ibibi byabo”. Iyi mvugo iboneka mu gitabo cya Tirmidhi

Na none Intumwa Muhamadi yagaragje ingaruka mbi zo kwigana no gukurikira abandi  gihumyi igira iti: 

“Muzakurikira neza neza imigenzo y’ababayeho mbere yanyu, kugeza ubwo n’iyo umwe muri bo yakwinjira mu mwobo w’ikibangu namwe muzawinjiramo, bizagera n’ubwo umwe muri bo aramutse akoranye imibonano mpuzabitsina n’umugore we ku mugaragaro namwe mwabikora, bizageza n’ubwo umwe muri bo aramutse aryamanye na Nyina wamubyaye namwe muzabikora…”. Iyi mvugo iboneka mu gitabo cya Tirmidhi

  1. KWEMERA IBIHEMBO BITEGANYIRIJWE ABASORE N’INKUMI BIHANGANIRA IBISHUKO BYA GISORE.

Abasore n’inkumi bagomba kwizera no kwemera ibihembo n’ingororano zikomeye Allah yateganyirije abitwaye neza mu busore n’ubukumi bwabo bakabukoresha bitwararika bakanitondera amategeko y’Imana bakanakoresha ubusore bwabo neza mu bibafitiye akamaro mu buzima bw’isi n’imperuka bakanirinda ibishuko bya gisore.

Gutekereza kuri izo ngororano n’ibihembo by’umwihariko Allah yabateguriye bibatera imbaraga zo gukoresha neza ubusore bwabo bagatsinda ibishuko n’ibigeragezo batekereza ko Allah yazirikanye ukwihanganira ibishuko bya gisore kwabaranze ku buryo bumva ko badakorera ubusa ahubwo hari ibyiza bateganyirijwe.

Intumwa Muhamad (Allah amuhe amahoro n’imigisha) yagaragje abantu bateganyirijwe ingororano n’ibihembo by’umwihariko ku munsi w’imperuka igira iti:

“Hari abantu barindwi Allah azatwikiriza igicucucucu cy’intebe ye y’icyubahiro ku munsi w’imperuka, muri abo bantu yavuzemo: n’umusore n’inkumi wabyirutse ari kuri gahunda za Allah”. Iyi mvugo iboneka mu gitabo cya Bukhari n’icya Muslimu

Iki gihembo rero ni umwihariko w’aba bantu harimo n’umusore n’inkumi babyirutse bari kuri gahunda yo kubaha amategeko y’Imana bakanirinda ibishuko bya gisore, abo Allah azabatwikiriza igicucu cy’intebe ye y’icyubahiro ibyo bikazaba ari umwihariko wabo mu rwego rwo kuzirikana ibyo bigomwe igihe abandi bantu bazaba bari ku zuba rikaze ryamanutse riri hejuru yabo muri mile imwe gusa (1,5Km), icyuya cyabarenze,ariko abo bantu barindwi harimo n’abasore n’inkumi bitondeye ubusore bwabo bakabukoresha neza birinda ibishuko ,abo iryo zuba ntaryo bazumva.

  1. KUGISHA INAMA

Abasore n’inkumi bagomba kwegera abamenyi b’idini, ababyeyi n’abakuru bakabagisha inama mu bibazo bibugarije. Kugirango abasore n’inkumi batunganirwe n’ibyo bakora, bagomba kugira abajyanama mu bamenyi b’idini n’ababyeyi babayobora bakanabagira inama mu bibazo bahura  nabyo mu buzima bwa buri munsi, abamenyi n’ababyeyi nabo basabwa kwagura ibituza byabo bagatega amatwi urubyiruko kandi bakarworohera kugirango rubisanzureho runabiyumvemo bityo rubashe kubagezaho ibibazo byose nta gutinya no kubishisha, ibyo bizabaha inzira zo kubayobora no kubafasha kubikemura, kuko ntawavura indwara atamenye. Abamenyi b’idini by’umwihariko bagomba guhura kenshi n’urubyiruko bakanagira gahunda zinoze  z’ivugabutumwa zigenewe urubyiruko nk’ibiganiro mbwirwaruhame bigamije kurebera hamwe ibibazo by’urubyiruko no kubishakira umuti, niyo mpamvu Intumwa Muhamadi (Allah amuhe amahoro n’imigisha) yaranzwe no kwiyegereza urubyiruko  no kurworohera kugeza ubwo rwamwisanzuragaho rugatinyuka kumugezaho ibibazo birwugarije Intumwa ikabishingiraho mu kurugira inama zo kuva muri ibyo bibazo.

Urugero:

Hari umusore waje ku Ntumwa Muhamadi (Allah amuhe amahoro n’imigisha) arayibwira ati:Yewe Ntumwa!Nyemerera njye nsambana, Intumwa iramubwira iti: Igira hino unyegere, uwo musore yegera Intumwa maze imufata ku rutugu iramubwira iti: Ese wakwemera ko hari usambanya umubyeyi wawe? Umusore ati: Oya. Intumwa iramubwira  iti: N’abandi ntibabyemera ko wasambanya ababyeyi babo, Intumwa irongera iramubaza iti: Wakwemera ko hari usambanya umukobwa wawe? umusore ati: Oya, Intumwa iramubwira iti: n’abandi ntabwo bemera ko byakorerwa abakobwa babo, Intumwa irongera iramubaza iti: Ese wakwemera ko hari usambanya mushiki wawe? Umusore ati:Oya, Intumwa iramubwira iti: n’abandi ntabwo bakwishimira ko bikorerwa bashiki babo, Intumwa irongera iramubaza iti: Ese wakwishimira ko hari usambanya Nyogosenge? umusore ati: Oya, Intumwa iramubwira iti: n’abandi ntabwo bakwishimira ko bikorerwa ba Nyirasenge, Intumwa irongera iramubaza iti: Ese wakwemera ko hari usambanya Nyoko wanyu? umusore aramusubiza ati: Oya, Intumwa iramubwira iti: n’abandi ntabwo bakwishimira ko bikorerwa ba Nyina wabo. Maze Intumwa Muhamadi (Allah amuhe amahoro n’imigisha) imufata ku rutugu imusabira ku Mana igira iti: Nyagasani mubabarire ibyaha bye,weze umutima we unamushoboze kurinda igitsina cye. kuva icyo gihe uwo musore ntabwo yongeye gutekereza icyaha cy’ubusambanyi. Iyi mvugo iboneka mu gitabo cya Ahmad

Abamenyi b’idini bagomba kwegera urubyiruko no kurugira inama zihariye nk’uko Intumwa Muhamadi  yegeraga  urubyiruko akarugira inama,

Intumwa Muhamadi yabwiye umusangirangendo witwa Abdullah mwene Abas iramubwira iti: Wa musore we, ngiye kukwigisha amagambo y’ingirakamaro:Ujye witondera amategeko y’Imana nayo izakurinda, ujye witondera amategeko y’Imana izajya ikuyobora mu byo ukora, nusaba ujye usaba Allah, niwiringira ujye wiringira Allah, kandi umenye ko n’ubwo abantu bose bakwishyira hamwe ngo bagire icyo bakumarira,ntacyo bakumarira uretse icyo Allah yakugeneye, kandi n’ubwo abantu bose bakwishyira hamwe kugirango bagire icyo bagutwara,ntacyo bagutwara uretse icyo Allah yaguteguriye, Ikalamu zanditse igeno zarazamuwe ntabwo zicyandika n’ibitabo byarazinzwe ntakiziyongeramo.

UMUSOZO

Zimwe muri Serivisi Tubagezaho